ილიას სახელმწიფო უნივერსიტეტისა და ტერაბანკის სტარტაპ პრეაქსელერაციის შემაჯამებელ, დემო დღე, 16 თებერვალს, 16:30 საათზე სასტუმრო სტამბაში გაიმართება.

პრე-აქსელერაცია ილიას სახელმწიფო უნივერსიტეტის ტექ მეწარმეობისა და ინოვაციების განვითარების ცენტრის Zoomout-ისა და ფაბლაბის ორგანიზებით ხორციელდებოდა ტერაბანკთან თანამშრომლობით, რომელიც გამარჯვებული გუნდისთვის გამოყოფს ფულად პრიზს 10,000 ლარის ოდენობით.

პროგრამაში მონაწილეობას ჯამში 24 გუნდი იღებდა, რომელთა წევრებს შორის არიან ილიას სახელმწიფო უნივერსიტეტის სტუდენტები და კურსდამთავრებულებიც. 6 კვირიანი პრე-აქსელერაციის ფარგლებში გუნდებს საშუალება ქონდათ ემუშავათ თემებზე როგორიცაა: 

1. იდეების გენერირება-დახვეწა
2. იდეის პროტოტიპირება და ვალიდაცია
3. ბიზნეს მოდელის დახვეწა 
4. სტარტაპის სამართვად საჭირო ფინანსური ცოდნა
5. საინვესტიციო ფონდების მოძიება
6. საგრანტო განაცხადების წერის ტექნიკები და საინვესტიციო პიჩის მომზადება

წინასწარი გადარჩევის შედეგად, დემო დღეზე 10 გუნდი წარსდგება და გამოვლინდება გამარჯვებული.

პრეაქსელერაციის მიზანია აღმოაჩინოს და ხელი შეუწყოს დამწყებ სტარტაპებს, შედეგად კი გააძლიეროს ქართული ეკოსისტემა.

შეხვედრის თარიღი: 16 თებერვალი, 2024

დრო: 16:30 საათი

ადგილი:სასტუმრო სტამბა, Dome სივრცე, მე-4 სართული

მონაწილე გუნდების შესახებ:

1. Portforall - პლატფორმა აერთიანებს საბანკო, კრიპტო & სამომხმარებლო ანგარიშებს ერთ აპლიკაციაში, რომ მომხმარებელს კომფორტული და მარტივი წვდომა ჰქონდეს საკუთარ ფინანსებზე, დროითი-რესურსის მინიმალური დანაკარგით;
2. Base2 - არის ვიდეო თამაში, რომელიც პროგრამირებით დაინტერესებულ ადამიანებს ეხმარება პირველი ნაბიჯების გადადგმაში და აკავშირებს მათ პროგრამირების სასწავლებლებთან;
3. Hoursetours - საცხენოსნო ტურიზმის ციფრული პლატფორმა
4. Helio.AI - რეკრუტინგის შიდა სოფტია, რომელიც კომპანიებს შერჩევის პროცესის ავტომატიზაციით საუკეთესო კანდიდატების სწრაფად აყვანაში ეხმარება;
5. InstaShop.ge/kz - ინსტაგრამის მარკეტფლეისი და საძიებო სისტემა ინსტაგრამ შოპინგისთვის;
6. Portico - ტვირთების ტრანსპორტირების მენეჯმენტის სისტემა, რომელიც ხელოვნური ინტელექტის დახმარებით ამარტივებს ლოჯისტიკურ პროცესებს;
7. Addme.ge - უნიკალური ციფრული სავიზიტო ბარათის პლატფორმა ეფექტური ნეთვორქინგისთვის;
8. Moise - პლატფორმა, რომელიც აერთიანებს მსმენელს, მუსიკოსებსა და ვენიუებს და მათთან ერთად ქმნის მუსიკალური სცენის მომავალს;
9. Archfix - არქიტექტურული SaaS - შენობების სახანძრო უსაფრთხოების ნორმებისა და მშენებლობის ხარჯების ავტომატურ გამომთველი სისტემა. პროექტის მიზანია არსებული მექანიკური გამოთვლების გრძელვადიანი მეთოდები ჩაანაცვლოს სრულად ციფრული მყისიერი დაანგარიშების სისტემით;
10. Strive - ონლაინ მარკეტფლეისია, რომელიც ეხმარება ვიდეო-თამაშების რანკირებული მატჩების მოთამაშეებს მენტორის პოვნასა და გეიმფლეის გაუმჯობესებაში. მეორე მხრივ, კი ფრილანსერობის მსურველ მენტორებს საკუთარი გეიმინგ უნარების მონეტიზაციის საშუალებას აძლევს.